حـيـاتـي فـي mbc action

حياتي في mbc
action

يا جماعة انا عندي صاحب اسمو عدنان , هاد بعمل حالو
بفهم بكل اشي .. شو ماتحكو بمواضيع بتلاقيه بخبص وبلاخم على اساس انو بفهم
اكتر واحد بالدنيا , يعني مستعد يناقش حامل بالحمل والولادة , والشرطة
بالحرامية , وبطلع براس المصري بشطف الدرج , وحتى ممكن يناقش السرلنكية
بمساحيق الغسيل .. وممكن يقنع هندي انه الشطة مش زاكية .. والاماراتي انو
ممكن يصير فقير , اللبناني انه لهجتهم دفشه والسوري انه باب الحارة اصله
اردني .. ماعلينا المهم زي ما قلتلكم بعمل حاله بعرف كل اشي ... مشان هيك
احنا قد ما بعرط وبسرح فينا قررنا ما نصدقه انا والشباب بأي اشي بحكيه ..
المهم كل فترة وفترة بنتجمع احنا الشباب , بس كل ما نرن على عدنان تلفونه
مغلق .. مر اسبوع بدون ما نعرف اخباره , خفنا عليه! .. رحناله عالبيت كان
مربي لحيته وحالته حاله وبأواعي النوم فتحلنا الباب .. سألناه مالك وين
الغيبة يازلمة؟؟ .. قال : انا قعدت اسبوع بالبيت اصنع بآلة ما حدا صنعها
غيري , بتشتغل لما واحد يدخل فيها وبتوقف هاي الالة لما انا احكيلها وقفي
..

طبعا انا مش بس ضحكت عليه .. لأ كمان وقت عالارض من الضحك .. بعرفو عريط
(يعني كل حكيه كذب) .. بس قلتله طيب وشو هاي الالة اشرحلنا عنها شوي؟ قال :
هاي آلة الي بدخلها بروح على قناة بالتلفزيون , يعني بعيش جوا قناة ..
ماله الزلمة انجن؟ ضليت اضحك واتخوت عليه واقله طيب بالله عليك دخلني على
سبيس تون خليني ازبط ساندي بل , انا بموت بالشقر .. ولا لأ لأ دخلني على
الجزيرة الرياضية خليني احضر مباراة ريال مدريد بأسبانيا .المهم عصب صاحبنا
, وحكالي اذا انت قد التحدي , ادخل على الالة وخلينا نشوف مين الي رح يضحك
عالتاني .. شو سخيف ! .. انا بضحك وكل عيوني دموع من الضحك , دخلت عالالة
مشان اثبت لصحابي انه هالعريط الكذاب زودها بكذبته هالمرة .. فعلا دخلت .. و
أول ما حطيت رجلي فيها... هوووووووووووووب ولا انا واقع عالارض بمكان غريب
بتطلع يمين شمال , انا بمكان زي لونا بارك أو ملاهي طريق المطار , بس مافي
العاب ولا اشي .. بس حواليي شرطة وناس لابسين ازرق ! مش عارف شو بدي اعمل
وين انا؟ , وين صحابي ! .. اجلت تفكيري لبعدين وقلت خليني اكتشف شو هاد
المكان ومين هدول الناس ؟ .. صرت ادور على واحد اسأله وين انا؟؟ .. بس
المشكلة كل اشكالهم بتخوف , مبين عليهم مجرمين

رحت عن واحد اشقراني شكله مبين عليه ابن عالم وناس .. بقله مرحبا االشباب
كيفك؟ , بالله وين احنا؟ دار وجهه علي ولا قدامي ( مايكل سكوفيلد ) .. وانط
عليه وانزل فيه تبويس وبوسه ورا بوسه .. وبالله عليك خليني اتصور معك ..
وانا ببوس فيه دفشني واتطلع علي نظراته البريئة , بحكيلي انت مين؟ قلتلو
انا بالغلط اجيت هون ومش فاهم شو القصة , معقول هاي هي المزرعه الي عايش
فيها؟ , والله كتير حلوة حكالي ولك يا غبي هاد السجن الي محبوس فيه ..
بحكيلو أوف يازلمة والله هيك السجن بأمريكا؟ .. كتير مرتب ونضيف .. اقلك
وشرفي انه احلى من المدرسه الي بدرس فيها .. قلي سيبك هسة من الحكي
خيلنا نخطط كيف بدنا نهرب , احنا هون محبوسين من زمان وكمان شهر رح يطلع
قرار من المحكمة بأعدامنا بقلو: اعدام مين يازلمة , انا والله مادخلني ..
انا بعرفش شو وصلني هون؟ .. انا بدي اروح على بيتي خلص

حكالي : يازلمة لا تنعجق و تبربر بالحكي كثير , المهم خليك معي شوي , هسه
انا داقق وشم على جسمي وهاد الوشم هو مخطط لمنشئات السجن , ووفقا للمخططات
الهندسية , احنا لو دخلنا من ماسورة المطبخ الي هي 5 إنش وضلينا نزحف بوسط
المناهل ونتشعبط على حيطان الحمام بسرعه 5 كيلو متر بالساعه بعدين نروح على
السيفون الي بالحمام ندخل فيه ونضل نغوص بأعماق الحفرة الامتصاصية للسجن ,
ممكن بعد اسبوع نكون هربنا من السجن بسهولة .. بشرط نفك المسمار او البرغي
تبع باب السجن .. و نطعجه بمقدار 29 درجة بعدين بنقدر لو رميناه بالسما و
..... انا (قاطعته ) : يازلمة حيلك حيلك , طول بالك يارجل شو هالتخبيص ؟
ليه اللف والدوران والحكي الفاضي , راس مالها انه بنجيب واحد من المساجين
يحطلنا رجل , او يقعد عالارض ونوقف على ضهره , وبنتشعبط (بنتعربش أي نتسلق )
على الحيط تبع السجن وبنهرب !.. أو حتى انت بتحطلي بتحطلي رجل و انا برفعك
بعدين .. مايكل(انصدم) : ولا اشي ! .. يازلمة وشرفي انك رهيب وذكي ! , انا
4 اجزاء كل جزء 20 حلقة من prison break وانا بخطط اهرب من السجن ومش طالع
معي اشي .. طلع الحل بسيط زي ما انت قلت .. وبقولو عن العرب اغبياء؟ والله
طلعت اذكى مني يا ازعر .. يالله روح خلينا نهرب

واحنا ماشيين بأتجاه حيط السجن بلشت اقله كيف كل البنات بالوطن العربي كله
بحبوه , و تلات ارباعهم حاطين صوره عالفيس بوك .. وبصراحة انا بقله هالحكي
وهو لسه قالب خلقته ومبين عليه مش مبسوط , قرفان البنات يعني .. وحكالي انه
مستحيل يفكر يحب بنت عربيه بحكيلو ليش؟ .. حكالي arab girls suck .. انا
خف عقلي وقررت انتقم لبنات بلادي ..

المهم , وصلنا عالحيط (جدار السجن) , طال من جيبتو شلن ( سنت ) .. وحكالي
صورة ولا كتابه؟ .. قلتله (صورة ) .. ورماها بالسما وطلعت كتابة .. رحت انا
اقنعته انه هاي اللعبة مش محسوبة .. ولازم نلعب حجرة ورقة مقص والفايز بحط
للتاني رجل وبرفعه .. وفعلا لعباناها وانا عملت بأيدي شكل زي الدبابة
وحكتلو ( الدبابة اقوى من الحجرة والورقة والمقص ) , وفعلا هو غبي صدق ,
قلتله حطلي رجل خليني اتعربش عالحيط , وانا فوق بمد ايدي الك وبرفعك ,
وبنهرب سوا.. فعلا المسكين شبك أيديه مع بعض , وخلاني اوقف عليهم ورفعني
للحيط .. اول ما وصلت فوق , صفرت بصوت عالي وصرت اصرخ ,
حراميييييييييييييييييييييييييييييي .. وهربت لحالي طبعا انا اول ما حكيتها
شفت من بعيد اكتر من 100 شرطي قاعد بركض بأتجاه مايكل , وانا هربت وضليت
اركض اركض .. لحد ما وصلت لاس فيغاس .. انا تعبان وجوعان كتيير .. والاكتر
منو اني بدي انام

ضليت امشي لحد ما لقيت فندق اسمو لاس فيغاس , دخلت هناك ما معي ولا نقله
ولا قرش , شفت صاحب الفندق .. قلتله : مرحبا حجي , الله محيي اللحية
الغانمه والله .. بتعرف احنا العرب كلنا والله بنحبك ودايما بنحضر ( لاس
فيغاس) , وشهامتك وكرمك مغطي على الكل والله .. هو صحيح فندقك عامله مشان
لعيبة القمار وشريبة الخمر , بس هاد ما بمنع انك انسان نضيف من جوا ,وبنتك
حلوة كمان .. بدون نقاش على طول قلي : اسمع بلا هز دنب , احكي مامعك مصاري
وبدك تنزل بغرفه عندي بعرفش كيف عرف , بس مو مهم .. المهم انه عرف الي بدي
ياه , وفعلا اللله يجزيه الخير نادى بنته الشقفة الموزة توصلي لباب الغرفة
الي بدي انام فيها ببلاش .. عالطريق بلشت اسلوب التزبيط الحفرتلي النوري , و
إيش يا فستق , ايش يالوز , يقبرني مشيتها , هجرت الونستون لأجل الشارلستون
.. وغطيني بالبكيني ... وهي قالبه خلقتها ومش طايقتني .. اول ما وصلتني
عالغرفة تركتني ونزلت .. دخلت عالغرفة , الوضع كتير حلو , انا مابدي انام
خلص بدي اضل قاعد عالكنباي واحضر افلام .. رحت فتحت التلاجة لقيت قزازة اشي
مش عارف شو هو , بس المهم شكلو بارد و زي الببسي , بس مش ببسي.. وانا بفتح
بالتلاجة , حسيت في اشي طالع على رجلي وقاعد بدغدغني , انا نطيت وقلت اكيد
صرصور .. بتطلع عليه .. لأ والله هاد عقرب ! وكتير كبيير ! حملت الشبشب
(بعيد عن السامعين) وصرت الحق وراه وانزل فيه خبط , وهو بصرخ : (ولك انا
سبايدر ماااااااان سبايدر ماااااااان , مش عقرب جدي ) ..

استوعبت كلامك بعد ما اكل مني 9 خبطات .. تورم العقرب ,قصدي الزلمة . قعدت
انا وياه عالكناباي وحطتلو تلج على راسه وعينيه الي تورمو من الضرب , وبوست
على راسه وقعدت انا وياه نسولف ونحكي .. المهم حبيته , و قلت والله غير
اسهر معاه , فهمته قصتي اني انا مو عارف شو الي وصلني هون , ولا عارف كيف
بدي اطلع من هون كمان .. و فكك من هالحكي خلينا نفتح على قناة الافلام
نحضرلنا شي فيلم .. فعلا فتحت على قناة , ولا فيلم the ring شغال .. انا
حضرته عشرين مرة , بس برضو مشان سبايدر مان بدي احضره كمان مرة .. مافي
مشكلة .. المهم اجا المقطع تبع لما البنت الي شعرها اسود الي بتطلع من
التلفزيون ( سمارا ) .. و فعلا بلشت تطلع عنجد من التلفزيون تبعنا .. و
تمشي بأتجاهنا

سبايدر مان هرب على الحمام وقفل على حاله الباب من الخوف , والبنت بلشت
تقرب علي ... انا خف عقلي بس قلت خليني أمشي معها بدوبلوماسية , اول ما
قربت علي قلتلها هلا والله بالامورة , وطلت حبة ملبس على طعم الليمون من
جيبتي , وقرصتها من خدها وصرت العبلها بشعراتها .. قلتلها انتي عمو وين
اهلك ليه بتمثلي بالافلام و نازله قتل بالعالم , مش عيب عمو؟ .. اضربك ديده
هلأ؟ .. ولا اخلي بابا مايعطيكي مصروف؟ هون البنت هاي قلبت شفايفها وصارت
تبكي ببراءة .. قلتلها خلص حبيبتي ما تبكي و خدي خمس ليرات من عمو سبايدر
مان , روحي فيهم على كوافيره تقصلك شعرك وترفعلك ياه .. وتحممي ونضفي حالك ,
وانا بكرة بنزّل بالجريدة خبر ( طفلة تبحث عن اهلها ) .. وانشالله
بتلاقيلك الماما والبابا راحت عند سبايدر مان والجبان مارضي يفتح .. بتدق
عليه وما بفتح .. ( بتشاطر بس بالافلام بعمل حاله قوي ) .. وصار يحكيلها :
روحي عني يا جربه يا نورية , قتلتي 3 نسوان و 3 زلام بالفيلم , بدك تقتليني
انا كمان؟؟ .. المهم عصبت هاي البنت من الكلام الي سمعته, و توحّشت وفجأة
طولو اضافرها وطلعلها انياب .. وصارت تلحق فيي ..

انا نطيت من الشباك و ضليت اهرب لحد ما عرفت انها مش وراي .. خلص انا تعبت ,
بدي ارجع على حياتي القديمة .. انا اشتقت لبهادل امي , لكاسات المي الي
كان يرشها علي ابوي وانا نايم .. اشتقت لزناخة صحابي .. اشتقت لمنتدى ابو
محجوب.. انا بدي ارجع لحياتي ..مشان الله

ضليت امشي لحد ما لقيت شرطة وعالم وناس .. وقفت اشوف ايش في , كان في فرقة
التحري الي بـ CSI هدول الي بحلو كل الجرايم وبعرفو القاتل ..

رحت على الزلمة رئيسهم الي هو دايما بعرف كل اشي بالدنيا , وبكتشف القاتل
من عينيه .. قلتلو داخل على الله ثم عليك انك تسمع قصتي , وشرحتله ياها
وقعد يفكر بس أقل من 3 دقايق , و فهمني كل اشي .. قلي اكيد انت عايش بآلة
من صنع حدا مخليك تدخل على قناة MBC action وتعيش جواتها , وقلي الحل هو
اني اعتذر لصاحبي واعترف بموهبته , وانا طبعا ما رضيت .. ما بكسر حالي لحدا
انا .. قلتله في حل تاني؟ قلي اه في روح لأخر الشارع ودق على الحيط اربع
مرات و احكي ( شرمووح فرفوووح طلعني من هالقناة ) .. فعلا عملت زي ما قلي
بالزبط .. بس المشكلة اني وقعت على الارض بمكان تاني مابعرف شو هو مشيت فيه
شوي .. لقيت واحد شكلو متعلم ومثقف ولابس بدلة.... سألتو مين انت؟ حكالي :
انا اكرم خزاااام , الجزيرة ... موسكوووووووووووووووو
ياااااااااااااااااااا حبيبييييييييييي , وقعت بقناة الجزيرة؟؟؟ ...

العن اشي اعيش هسه مع اسامة بلادن او ما الاقي حالي الا بدارفور أو كشمير
.. لا ياعمي بدي اطلع من هون وصرت اصرخ , ولك عدناااااااااااااااااااااان
مشان الله طلعني من هون انا اسف , انت انسان معجزة , انت عالم , انت احسن و
أشهر و واعظم مكتشف بس مشان الله طلعني وفعلا سمعت صوته بقول : وقفي يا
آلة .. ورجعت عالغرفة الي كنت فيها وانا ببكي , وصرت احكي لصحابي شو صار
معي و الكل صار يضحك علي بفكروني بكذب .. والكل مو مصدقني .. غير عدنان ,
الي من هداك اليوم لليوم , وانا بخاف منو , و الي بأمرني فيه انا بطيعه .. و
الله يعين الي بوقع بقناة mbc action

ضمن مسابقت افضل موضوع )

ههههههههههههههههههههههههههههههههههههههههههههههه
بجننننننننننننننننننن موضوعك بس طويل اتعبني عبين ما خلص
الله سعطسك العافية عليه
والله ما في احلى من mbc اكشن

هههههههههههههههههههههههههههههه
عن جد موضوع بجنن وحلو وخيالي لدرجه

مشكوووووووووووور اخ حمزه

اشنالله تكون عجبتكو التنهيف بعرف خبالي واسع لدرجه المه متكون عجبتكو القصه
والمره الجاي بحكيلكو قصدي بسبيستون ههههههههههههههههههه

منووووووورين وربي ما ننحرم من هيك طله

هههههههههههههههههههههههههه بضحك لكـــــــــــ بتجنن حمزهـ اذا من خيالك والله
ماشاء الله عنكـ روعة وفكرة من الاخر
موفق يا رب بالمسابقة

دمتــــــــــــــ

يسلموووووووووو حمزة حلو بس طويل يعني قريته للاخر بس بيضحك بتمنى لك الفوز

يسلموووووووووووووو على الردوووود الناااااااااايس
منورين وربي

انشالله تكون عجبتكو القصه